ABAO Bilbao Operaren 72. Denboraldiak, askotariko estiloz eta konposizioz osatuak, musika-sorkuntzaren alorreko ehun urte baino gehiago bilduko ditu, besteak beste XVIII. mendearen amaierako Mozart fina eta XX. mendearen hastapenetako Puccini hunkigarria, istorio eta drama hunkigarrietako maitasun-eraginean eta sentimenduen leherketan oinarrituta. Bost konpositorek, Gounod, Donizetti, Mozart, Verdi eta Puccinik, errepertorio italiarreko obra ezagunak ekarriko dituzte ABAOren oholtzara, L’elisir d’amore, Rigoletto eta La bohème, hain zuzen ere, eta hain ohikoak ez diren errepertorio frantseseko eta alemaniarreko obra bana: Roméo et Juliette eta Die Entführung aus dem Serail (Bahiketa harenean). Oholtzan, lau emakume nabarmenduko dira: Nadine Sierra (debuta egingo du), Jessica Prat, Sabina Puértolas eta Miren Urbieta. Haien ondoan, Javier Camarena eta Ismael Jordi abeslari apartak, bai eta Joel Prieto eta Amartuvshin Enkhbat ere, debuta egingo dutenak, besteak beste. Emanaldiekin bat eginda, ABAO Bilbao Operak aldibereko jarduera bizia egiten jarraituko du, hitzaldi-zikloak, tailerrak eta bisita gidatuak eskainiz, publiko berriak fidelizatzeko eta erakartzeko ekintzak eginez, eta hainbat erakunde eta enpresarekin elkarlanean beste gizarte- eta kultura-jarduera batzuk antolatuz. BBVA Fundazioak, ezagutza zientifikoa eta kultur sorkuntza bultzatzen dituelako bereizten denak, denboraldiaren babesle nagusia izanez lagunduko dio ABAO Bilbao Operari.